حروف مجدوبة

السلام عليكم أحبائي وأصدقائي بمناسبة عيد المولد النبوي أهدي لكم قصيدة بعنوان  ( مُحَمَّدْ ِزينْ السّْمِية)
صلــى الله عليك يَـــاشْفِـــيعْ الأُمَّـــة وَحْمَــــــاهَـــا
       يَارَسُولْ الله اسْمَكْ يَحْلَى بَالتَّهْلِيلْ
                   //القسم الأول //
صلـــى الله عليك سْمَــيْتَــكْ ِزينَــــة يَــامَحْــلاَهَــــا
    نَتْقَرَّبْ بِيهَا لِيكْ نَظْفَرْ بَكْمَالْ التَّفْضِيلْ
صلــــى الله عليك قـَدّْمَــــا فَـــالأَرْضْ أُوفَسْمَــاهَــا
  عْدَدْ حْجَرْ أُوطُوبْ وْكُلّْ مَا نَهْمَرْ قَطْرْ السِّيلْ
صلـــــى الله عليك يَـــالشَّــافَــعْ دِيمَـــا نَقْــرَاهَــــا
    فِيهَا كُلّْ الْخِيرْ النَّالْ بِهَا كُلّْ التَّبْجِيلْ
                 //القسم التاني//
صلـــى الله عليـــك عَـــدّْ مُـــوجْ الْيَــمْ فَمَجْرَاهَــــا
    بْقُدْرَةْ مُولْ الْمُلْكْ كَوْنَكْ مَنْ نُورُو الَجْلِيلْ
صلــــى الله عليك عَدّْ خَمْسْ وْقَــاتْ أُومَنْ أَدَّاهَـــا
   وَالزّْكَا مَفْرُوضَة حَقّْ وَنْصِيبْ لْكُلّْ عْلِيلْ
صلـــى الله عليك بْجَاهْ مَنْ خْلَقْ الْكَسْدَة وَنْشَاهَـــا
     أُوَّهَبْهَا نُورْ لَبْصَارْ وَالْفِكْرْ مْعَ التَّاِويلْ
               //القسم الثالث //
صلـــــــى الله عليك يـَــاللِّي أَيـَـاتَكْ مَـــاحْلاَهَـــا
     لْكُلّْ عْبَادْ الله وَالّْذِي يَصْغَى دَا التَّرْتِيلْ
صلـــــــى الله عليك عْدَدْ مَنْ نَبْتَ وْمَنْ سْقَاهَـــا
    بَقْدَرْتُو وَرْضَاهْ كُلّْ غُصْنْ يَتْمَايَسْ وَيْمِيلْ
صلـــــــى الله عليك كـُـــلّْ وَقْتْ عْشَاقَة وَنْزَاهَـــا
    هِيَّا مَفْتَاحِي وْحُلْتِي يُومْ نْكُونْ وْحِيلْ
              //القسم الرابع //
صلـــــى الله عليك عَدّْ لَطْيَـــارْ وْحُسْنْ اشْدَاهـَــا
    بَالصَّلاَةْ عْلِيكْ كُلّْ مَصْبَاحْ يْعُودْ شْعِيلْ
صلــــى الله عليك جُــوهْــرَة فِي قَلْبِي مَغـْـلاَهـَــا
    لَلْخَلْقْ أُولَعْبَادْ كِيفْ أَمَرْ لِيهْ التَّوْسِيلْ
صلـــــى الله عليك سَاعْةْ الْمُوتْ يُومِي نَلْقـَـاهَــا
    وَنْشَهَّدْ بَالله وَالنّْبِي فِي سَاعَةْ لَرْحِيلْ
             
                 //القسم الخامس//
حُبـَّــكْ يـَــالَحْبِيبْ عَــــمّْ رُوحِي ظَفْرَتْ بَامْنـَـاهَــا
    حَازْ الْقَلْبْ مْرَاغْبُو بَعْدْمَّا كَانْ وْحِيلْ
صلـــى الله عليك بْجَاهْ خَالـَقْ لَكـْـوَانْ حْيَاهَـــا
   وْجَعـْلَكْ مَصْبَاحْ كْذَالَكْ عْلاَجْ لْكُلّْ عْلِيلْ
فـِــي زْجَـالِي هَدِي قْصِيدْتِي قَلْبِي لِيكْ هْدَاهَـــا
   صْفَا مَنْ عَسْجَدْ خَالْصَة مَافِيهَا تَخْبِيلْ
وَاسْمِـــي وَاضَــحْ مَعْلُومْ مَاخْفَى لَلْحَافَظْ تْلاَهَـا
خُدْرَا عبدالحق خَالْقِي يَنْعَمْ بَالتَّسْهِيلْ
                         الواصي الزجال خدرا عبدالحق